9-may — Xotira va qadrlash kuni bayrami munosabati bilan Yangiyer Abu Ali ibn Sino nomidagi Jamoat salomatligi texnikumi jamoasi hamda talabalari tomonidan Motamsaro ona haykali poyiga gulchambar va gullar qo‘yildi.
Tadbir davomida Vatan ozodligi, yurt tinchligi va bugungi osoyishta hayot yo‘lida jon fido qilgan ajdodlar xotirasi chuqur hurmat bilan yod etildi. Motamsaro ona timsoli orqali sabr, matonat, fidoyilik va ona qalbidagi cheksiz sog‘inch ramzi yana bir bor ehtirom bilan tilga olindi.
Shuningdek, tadbir ishtirokchilari tomonidan yurtimiz ravnaqi yo‘lida xizmat qilgan insonlarning porloq xotirasiga ta’zim bajo keltirilib, bugungi tinch va farovon hayotning qadriga yetish, tarixiy xotirani asrab-avaylash har bir avlodning muqaddas burchi ekani ta’kidlandi.
Mazkur ma’naviy tadbir yoshlar qalbida vatanparvarlik, milliy g‘urur va ajdodlar xotirasiga hurmat tuyg‘ularini yanada mustahkamladi.
